ಮೆಡಿಕಲ್ ಕಾಲೇಜಿನ ಶವಗಳು

ಮೆಡಿಕಲ್ ಕಾಲೇಜಿನ
ಶವಗಳಷ್ಟೇ ಪುಣ್ಯವಂತರು
ಸತ್ತ ಮೇಲೂ ಬದುಕುತ್ತಾರೆ
ಭಾವಿಸುತ್ತಾರೆ
ಯಾರದೋ ಗುರಿಗೆ
ದಾರಿಯಾಗುತ್ತಾರೆ
ಯಾವುದೋ ಯಶೋಗಾಥೆಗೆ ಮುನ್ನುಡಿಯಾಗುತ್ತಾರೆ
ಬರಿಯ ಶವವೆಂದಿಲ್ಲಿ
ಅನಾದರವಿಲ್ಲ
ಭಯವೂ ಇಲ್ಲ
ಉಸಿರಾಡುವ ನಮಗಿಂತ
ಶುದ್ಧವಿರುತ್ತಾರೆ
ಸಾವಿನ ಕರಾಳತೆ ಮರೆಸಿ
ಅರಳುತ್ತಾರೆ
ಸಾಗಿದ ಪಯಣ ಮರೆತು
ಲೋಹದ ಮೇಜಿನ ಮೇಲೆ
ಮಲಗಿದವರೆಲ್ಲ ಭೀಷ್ಮರು.
ವೈದ್ಯವಂಶದ ಪಿತಾಮಹ
ಪದವಿ ಪಡೆದವರು
ಜ್ಞಾನಭಂಡಾರದ ಕೀಲಿಕೈಯ್ಯಾದವರು
ಒಂದೊಮ್ಮೆ ನಕ್ಕು, ಅತ್ತು
ಸಾಗಿದ ಪಯಣಕೆ ಮುಕ್ತಾಯ ಹಾಡಿದವರು
ಇಂದಿಲ್ಲಿ ನಶ್ವರ ದೇಹದ
ಅಚ್ಚರಿಗಳ ತೆರೆದು
ಸ್ವಚ್ಛಂದವಾದರು
ಮಣ್ಣಲ್ಲಿ ಕೊಳೆತರೇನಿದೆ
ಮಹತ್ತು
ನಾಳೆಯ ಕನಸಿಗಾಗಿ ದೀವಿಗೆ
ಹೊತ್ತು
ಉಳಿಸಬೇಕು ಮೌನಸೇವೆ
ಗುರುತು
ಅದಕ್ಕೆ ಮೆಡಿಕಲ್ ಕಾಲೇಜಿಗೆ
ಶವವಾಗಬೇಕು

 ಡಾ.ಭವ್ಯ ಅಶೋಕ್ ಸಂಪಗಾರ್
ಅನಾಟಮಿ ವಿಭಾಗ
ಜೆ.ಎನ್. ವೈದ್ಯಕೀಯ ಸಂಸ್ಥೆ
ಕೆ.ಎಲ್.ಇ
ಬೆಳಗಾವಿ.
ಪೋನ್-7090775784.