ಹುನಗುಂದ: ತಾಲೂಕಿನ ಅಮೀನಗಡ ಪಟ್ಟಣದ ಉದಯವಾಣಿ ದಿನಪತ್ರಿಕೆಯ ವರದಿಗಾರ ಹಾಗೂ ಲೇಖಕ ಹಸನಡೋಂಗ್ರಿ ಎಚ್. ಬೇಪಾರಿ ಅವರ ‘ಅಮ್ಮ ಎಂಬ ಕಡಲು’ ಕಥಾಸಂಕಲನವು ಬೆಳಗಾವಿಯ ಹೊಂಬೆಳಕು ಸಂಘದ ಪ್ರತಿಷ್ಠಿತ “ರಾಷ್ಟ್ರಕೂಟ ಸಾಹಿತ್ಯಶ್ರೀ” ಪ್ರಶಸ್ತಿಗೆ ಆಯ್ಕೆಯಾಗಿದೆ.
ಬೆಳಗಾವಿಯ ಹೊಂಬೆಳಕು ಸಂಘವು ಕಳೆದ 26 ವರ್ಷಗಳಿಂದ ಶ್ರೇಷ್ಠ ಕೃತಿಗಳನ್ನು ಗುರುತಿಸಿ ಈ ಗೌರವವನ್ನು ನೀಡುತ್ತಾ ಬಂದಿದೆ. ಅದರಂತೆ 2025ರಲ್ಲಿ ಪ್ರಕಟಗೊಂಡ ನನ್ನ ‘ಅಮ್ಮ ಎಂಬ ಕಡಲು’ ಕಥಾಸಂಕಲನವು ಈ ಗೌರವಕ್ಕೆ ಪಾತ್ರವಾಗಿದೆ ಎಂದು ಲೇಖಕ ಬೇಪಾರಿ ಪತ್ರಿಕೆಗೆ ತಮ್ಮ ಸಂತಸವನ್ನು ಹಂಚಿಕೊಂಡಿದ್ದಾರೆ.
ಅಭಿಪ್ರಾಯ:
“ಇದು ನನ್ನೊಬ್ಬನ ಗೆಲುವಲ್ಲ; ಅಮ್ಮನ ಮಮತೆಯನ್ನು ಅಕ್ಷರಗಳಲ್ಲಿ ಕಂಡು ಅಪ್ಪಿಕೊಂಡ ನಿಮ್ಮೆಲ್ಲರ ಪ್ರೀತಿಯ ಫಲ. ಅಮ್ಮನ ಅಲೆಗಳು ನಿಮ್ಮ ಮನದ ತೀರ ತಲುಪಿದವೇ ನನಗೆ ಸಂದ ದೊಡ್ಡ ಪುರಸ್ಕಾರ. ಈ ಕೃತಿಯನ್ನು ಗುರುತಿಸಿದ ಆಯ್ಕೆ ಸಮಿತಿ ಹಾಗೂ ಸಂಘದ ಎಲ್ಲರಿಗೂ ಕೃತಜ್ಞತೆಗಳು. ನಿಮ್ಮ ಪ್ರೀತಿ, ಆಶೀರ್ವಾದ ನನ್ನ ಬರಹಕ್ಕೆ ಸದಾ ದೀಪವಾಗಿರಲಿ” ಎಂದು ಅವರು ಪತ್ರಿಕೆಗೆ ತಿಳಿಸಿದ್ದಾರೆ.