ನನ್ನ ಸಾಯಿಕಲ್

ನಮ್ಮ ಅಪ್ಪ ನನಗೆ ಒಂದು
ಚಿಕ್ಕ ಸಾಯಿಕಲ್ ಕೊಡಿಸಿದ
ಮನೆ ಮಂದಿಗೆಲ್ಲ ಇಂದು
ತುಂಬ ಹರುಷ ತರಿಸಿದ

ಎನಿತು ಚೆನ್ನ ನೀಲಿ ಬಣ್ಣ
ಮಿರಿ ಮಿರಿ ಮಿಂಚುವದು
ಕಣ್ಣು ಬಿಟ್ಟು ನೋಡಿದರೆ
ದೃಷ್ಟಿ ತಗಲುವಂತಿಹುದು

ಅಂದದ ಸುಂದರ ಸೀಟು ನೋಡು
ಚೆಂದದ ಚೆಲುವಿನ ಹ್ಯಾಂಡಲ್ ನೋಡು
ಗರಗರ ತಿರುಗುವ ಗಾಲಿಯ ನೋಡು
ತಿರುಗಿಸುತಿರುವ ಪ್ಯಾಡಲ್ ನೋಡು

ಲಾಕ್ ಉಂಟು ಬ್ರೇಕ್ ಉಂಟು
ಟ್ರಿನ್ ಟ್ರಿನ್ ನಾದದ ಗಂಟೆ ಉಂಟು
ಸ್ಕೂಲ ಬ್ಯಾಗ ಇರಿಸಲು
ಕ್ಯಾರಿಯರವೂ ಉಂಟು

ಟ್ರಿನ್ ಟ್ರಿನ್ ಗಂಟೆ ಬಾರಿಸಿ ನಾನು
ಲಗುಬಗೆ ಶಾಲೆಗೆ ಹೊರಡುವೆನು
ಎಲ್ಲರಿಗಿಂತ ಮೊದಲೆ ನಮ್ಮ
ಶಾಲೆಗೆ ಬಂದು ತಲುಪುವೆನು

 ಪರಿಸರ ರಕ್ಷಣೆಯ ಕೂಗು
…………………………….

ವಿಶ್ವ ಪರಿಸರ ದಿನ ಸಮೀಪಿಸಿದಂತೆ
ಪರಿಸರ ರಕ್ಷಣೆ ಕೂಗು ಅಬ್ಬರಿಸುತಿದೆ
ಬೋರ್ಗಲ್ಲ ಮೇಲೆ ಮಹಾಮಳೆ ಸುರಿದಂತೆ
ಕೋಣನ ಮುಂದೆ ಕಿನ್ನರಿ ಬಾರಿಸಿದಂತೆ

ಈ ಕೂಗು ಹೇಗೆ ಹಾಸ್ಯಕ್ಕೆ ಈಡಾಗಿದೆಯೆಂದರೆ
ತಾನೇ ಕಳ್ಳತನ ಮಾಡುತ್ತ ಮಾಡುತ್ತ
ಕಳ್ಳನನ್ನು ಹಿಡಿಯಿರಿ ಹಿಡಿಯಿರಿ ಎಂದು
ಬೊಬ್ಬೆ ಹಾಕುತ್ತ ಓಡುತ್ತಿರುವವನಂತೆ

‘ಮದ್ಯಪಾನ ತುಂಬ ಹಾನಿಕರ’ ಎಂದು
ಮದ್ಯದ ಬಾಟ್ಲಿ ಮೇಲೆ ಲೇಬಲ್ ಹಚ್ಚಿದಂತೆ
‘ಧೂಮಪಾನ ಬಲು ಅಪಾಯಕರ’ ಎಂದು
ಸಿಗಾರ್ ಪ್ಯಾಕೆಟ್ ಮೇಲೆ ಛಾಪಿಸಿದಂತೆ

ಇಲಿಗಳೆಲ್ಲ ಕೂಡಿ ಮಾತಾಡಿಕೊಂಡವಂತೆ
ಬೆಕ್ಕಿನ ಕೊರಳಿಗೆ ಗಂಟೆ ಕಟ್ಟಬೇಕಂತೆ
ಕೊರಳಿಗೆ ಗಂಟೆ ಕಟ್ಟುವವರಾರು ಎಂದರೆ
ಇದಕ್ಕೆ ಉತ್ತರವೇ ಸಿಗಲಿಲ್ಲವಂತೆ

ಆರ್. ಎಸ್. ಚಾಪಗಾವಿ
ಬೆಳಗಾವಿ 8317404648